“බද්ද කූල් කිරීම”

මම හිතන්නේ "බදු" කියන වචනය රීබ්‍රෑන්ඩ් කරන්න ඕනේ.

දැන් උදාහරණයක් විදි‍යට මම ලංකාවේ විශ්ව විද්‍යාලෙ යන කාලේ මගේ මිත්‍ර‍යෝ "රැග් එක", "නවක වදය" කියන වචන පාවිච්චි කරේ නැහැ. එයාලා ඒ වෙනුවට "තෙල ගහනවා", "වාත කරනවා" වගේ වචන තමයි පාවිච්චි කරේ. රැග් එක වගේ නෙවෙයි තෙල. ඒක සැර බාල කරපු වෙර්ශන් එකක් විදියට තමයි ඒගොල්ලො මාකට් කරේ. සමහර නවක ශිෂ්‍යාවො, "අනේ! ඒ අය්යාලාගේ තෙල හරිම ශෝයි", "මේ අපි වෙනුවෙන් නේ මේ හැමදේම එයාලා කරන්නේ" කියන තැනකට ඒක ගේන්න තරම් එයාලා දක්ෂ වුණා. 

ඊට පස්සේ මම දැකපු හොඳම උදාහරණෙ තමයි ලංකාවේ "මල්ටි ලෙවල් මාකටින්ග්" කරන සෙට් එක. "පිරමීඩ ජාවාරම්" කියන හරිම කැත වචනේ එයාලා බොහොම ලස්සනට, ඉන්ටර් නැශනල් බිස්නස් එකක් කරනවා. ඒකෙ පිටිපස්සෙ ඉන්නෙත් විශ්ව විද්‍යාල ශිෂ්‍ය ශිෂ්‍යාවෝ තමයි.

බදු කිව්ව ගමන් ලංකාවේ මිනිස්සුන්ට මතක් වෙන්නේ, රජ කාලේ ගොයම් කැපුවට පස්සේ ආරච්චිලා ඇවිල්ලා, උඹ දැඟලුවොත් එතනාව කුදලගෙන යනවා කියලා, තමන්ගේ මී මී මීමුත්තා බය කරලා, වී මලු උස්සගෙන ගියපු හැටි. එහමත් නැත්නම් ටොරින්ග්ටන් ආණ්ඩුකාරයා ගහපු බලු බද්ද.

ඒක වෙනස් කරන්න සුපිරි මාකටින්ග් පාරක් ඕනේ. කොටින් ම කිව්වොත් "බද්ද කූල් කරන්න ඕන". ඒකට මුලින් ම අපේ විශ්ව විද්‍යාල යාලුවො කරා වගේ "බදු" කියන වචනය වෙනස් කරන්න ඕනේ. ඉස්සර අපේ ගාල්ලේ ඉස්කෝල වල එක එක උත්සව වලට දැම්මේ ම ලතින්, ප්‍රංශ නම්. මේ ලෝකෙ මල හත්තිලව්වක් තේරුනේ නැති වුනාට "සෙරෙනාටා", "එස්ට්‍රෙල්ලා" එහෙම කිව්වාම මරු ගතියක් තිබ්බා. අන්න ඒ වගේ නමක් ඉස්සෙල්ලා ම හොයාගන්න ඕන.

උදාහරණෙකට අපි හිතමු "බද්ද=ෆිස්කලයින්", බදු ගෙවනවා ="ෆිස්කලයින් කරනවා", බදු ගෙවන්නා = "ෆිස්කලයිට්" කියලා රීබ්‍රෑන්ඩ් කරා කියලා.

ඔන්න එතකොට අලුත බැඳපු නෝනලා දෙන්නෙක් කොෆි බීන් එකේ සෙට් වෙලා, "මකියාටො" එකක් බොන අතරෙදි, මේ වගේ සංවාද ඇතිවෙන්න පුලුවන්.

"ඔයාලගේ ෆැමලි එකේ මේ අවුරුද්දෙ ‘ෆිස්කලයින් පොයින්ට්ස්’ කීය ද ඩාලින්ග්?"

-"අපේ නම් පොයින්ට්ස් 50k අනේ. අපි ඉතින් ඩෙලක්ස් මෙම්බර්ස් ල නේ."

ලහිපිටේ මගුල් පිටුවේ, "බොදු ගොවි, අගනුවර බෞද්ධ පිරිමි පාසලක උගත්, මොරටුව ඉන්ජිනේරු උපාදිය හිමි, ‘ෆිකලයිට්’ (ප්ලැටිනම්) පුතුට... " වගේ දැන්වීම් යන්න පුලුවන්.

තරුණ කොල්ලෝ කෙල්ලෝ "ෆික්සලයින් කරලා", දේශීය ආදායම් දෙපාර්තමේන්තුවෙන් එළියට ඇවිල්ලා, "ෆික්සලයින් ජයිව්" එක කරලා, පස්ස වනන ටික් ටොක් කරලා එවා ට්‍රෙන්ඩින්ග් වෙන්න පුලුවන්.

අන්න එතකොට තමයි සිරා අරගලයක් ලයින් වෙන්නේ!